„Þetta var hörkuleikur en ég hefði viljað fá meira út úr þessu,“ sagði Júlíus Ármann Júlíusson, þjálfari Aftureldingar/Fram, eftir 2-2 jafntefli gegn ÍA á heimavelli. „Við hefðum bara átt að klára þetta. Við fengum færi til þess að klára þetta í lokin og líka bara í leiknum sjálfum.“
Lestu um leikinn: Afturelding/Fram 2 - 2 ÍA
Júlli gerði taktískar breytingar í hálfleik og færði leikmenn til á vellinum í von um að finna glufur á Skagaliðinu.
„Við vorum að reyna að fara á veikleika þeirra og þess vegna gerðum við smá breytingar og tilfærslur inn á vellinum.“
Tilfærslurnar hleyptu nýju lífi í sóknarleikinn og Afturelding/Fram skoraði tvö mörk. Það dugði ekki til sigurs en þjálfarinn var þrátt fyrir það ánægður með sitt lið.
„Ég er mjög sáttur við mínar stelpur. Þær lögðu sig fram og það var mikil barátta í mínu liði.“
Það var ekki hægt að sleppa Júlla án þess að spyrja um hans hlið á uppákomunni sem stal senunni rétt fyrir hálfleik en þá stoppaði Óliver dómari leikinn til að eiga orð við þjálfarateymi liðanna. Júlli vildi lítið gera úr atvikinu og segir að allir hafi náð sáttum.
Eftir 8 leiki er Afturelding/Fram í 7. sæti deildarinnar með 7 stig. Júlli er ekki ánægður með þá uppskeru og vill koma liðinu ofar í töfluna.
„Við viljum meira. Við erum með það gott lið að við ættum að geta gert betur. Við erum búnar að vera óheppnar í að minnsta kosti þremur af þessum fjórum jafnteflisleikjum og höfum verið að fá mörk á okkur í lokin.“
„Við viljum vera ofar en okkur var spáð og við stefnum kannski á miðbikið bara,“ sagði Júlli meðal annars en hægt er að horfa á allt viðtalið við hann í sjónvarpinu hér að ofan.
Athugasemdir