ÍBV tók á móti Sarpsborg í kvöld og töpuðu 0-4. Kristján Guðmundsson þjálfari eyjamanna var að vonum svekktur með úrslit leiksins.
„Svekkelsi að henda þessu svona frá okkur eins og kjánar í lokin, fá á okkur þriðja og fjórða markið."
„Ef við horfum bara á leikinn yfir heild og kannski fyrri hálfleikinn þá vorum við bara fínir. Sköpuðum okkur mjög góð færi, allavega tvö mjög góð og eitt hálffæri. Það kennir okkur bara að við verðum að nýta færin okkar í svona leik."
Yvan Erichot fór meiddur af velli eftir höfuðhögg á þriðju mínútu leiksins. Kristján segir að það hafi verið blóðtaka fyrir eyjamenn.
„Já, það er það. Hann er mjög mikilvægur í fjögurra manna vörninni hjá okkur. Hann er einn okkar besti varnarmaður, það var mikið áfall en við unnum okkur vel úr því. Það sást ekki mikið á leiknum hjá okkur að Siggi, 18 ára drengur kom inná og spilaði þennan leik."
Athugasemdir