Það voru ekki liðnar nema tæpar fjórar mínútur af leiknum þegar heimamenn fengu vítaspyrnu. Ragnar Bragi Sveinsson ætlaði þá að fara framhjá Josip Zeba sem að felldi hann á vítateigslínunni. Vítaspyrna réttilega dæmd.

Geoffrey Castillion fór á vítapunktinn og setti boltann í markið af miklu öryggi þrátt fyrir að Vladan Djogatovic hafi farið í rétt horn.

Castillion var aftur á ferðinni stuttu síðar þegar hann setti boltann í slánna eftir frábæran sprett upp vinstri kantinn.

Hákon Ingi Jónsson tvöfaldaði forystu Fylkis á 16. mínútu þegar hann setti boltann í netið af stuttu færi eftir geggjaða fyrirgjöf frá Daða Ólafssyni. Vörn gestanna gjörsamlega úti á þekju! 2-0 í hálfleik.

Síðari hálfleikur fór rólega af stað og náðu gestirnir ekki að ógna marki Fylkis mikið. Þegar tuttugu mínútur voru til leiksloka átti Stefán Alexander Ljubicic fínt skot á markið sem að Stefán Logi kýldi frá, beint í fætur Primo sem hitti boltann illa og flaug hann hátt yfir markið. Eitt allra besta færi Grindavíkur í leiknum.

Það var ekki fyrr en í uppbótartíma sem að Grindavík minnkaði muninn en það mark kom bara alltof seint. Sigurjón Rúnarsson skallaði þá boltann í netið af stuttu færi.

Lokatölur á Wurth-vellinum 2-1 og Fylkir ná þremur dýrmætum stigum á meðan útlitið fyrir Grindavík er að verða ansi dökkt.