Roberto Di Matteo fyrrum stjóri og leikmaður Chelsea telur að annar leikmaður sem átti einnig frábæran feril hjá félaginu muni stýra því í framtíðinni, það er John Terry.

„Hann verður þar stjóri einn daginn, sem leikmaður skrifaði hann niður punkta sem hann ætlaði að nýta sér þegar hann færi að þjálfa og nú hefur hann náð sér í dýrmæta reynslu sem aðstoðarþjálfari," sagði Di Matteo en Terry aðstoðar Dean Smith hjá Aston Villa.

Di Matteo ræddi einnig um Frank Lampard.

„Frank verður frábær þjálfari, hann er mjög klár náungi sem leggur mikið á sig til að ná árangri. Ég held að þetta hafi verið mjög góð ákvörðun hjá Chelsea að ráða hann á þessum tímapunkti."