Þetta var fyrsti leikur Juve eftir óvænt tap gegn Manchester United í Meistaradeildinni í miðri viku. Ítalíumeistararnir verðskulduðu sigurinn og var Allegri stoltur af viðbrögðum sinna manna.

„Við höfðum gott af því að tapa fyrir Manchester United. Ég er stoltur af því hvernig strákarnir svöruðu þessu. Við fórum í smá sjokk eftir tapið á miðvikudaginn en strákarnir voru klárir í slaginn í dag og það er mjög lýsandi fyrir fagmennskuna sem ríkir í hópnum," sagði Allegri.

Gonzalo Higuain var seldur frá Juve til Milan í sumar og var hann í byrjunarliði heimamanna. Sóknarmaðurinn átti afleitan leik þar sem hann klúðraði vítaspyrnu í fyrri hálfleik og lét reka sig af velli í þeim síðari. Allegri kom sínum fyrrverandi lærisveini til varnar líkt og leikmenn Juve gerðu að leikslokum.

„Gonzalo átti góðan leik þar til hann klúðraði vítinu. Þetta er skiljanlegt, tilfinningar geta stundum borið mann ofurliði."

Juve er með sex stiga forystu á Napoli á toppi ítölsku deildarinnar.