Enska úrvalsdeildarfélagið West Ham United er alvarlega að íhuga að hætta við að fá Samir Nasri á frjálsri sölu. Þetta kemur fram í The Mirror í kvöld.
Nasri hefur verið án félags síðan í janúar en þá spilaði hann með Antalyaspor í Tyrklandi. Hann rifti samning sínum við félagið eftir aðeins átta leiki.
Í febrúar á þessu ári var hann svo dæmdur í bann fyrir að brjóta lyfjareglur WADA. Bannið gildir fram í janúar en þrátt fyrir það vildi enska úrvalsdeildarfélagið West Ham semja við hann.
Nasri fór í læknisskoðun í dag og á að fá 80 þúsund pund í vikulaun en West Ham gæti þó hætt við skiptin.
Líkamlegt ástand franska leikmannsins er ekki gott og er talið að hann geti ekki spilað fyrstu leikina sína í janúar en samningurinn er aðeins út tímabilið.
West Ham er ekki tilbúið til þess að fá enn einn ofurleikmanninn á lista sem getur ekki tekið þátt í leikjum liðsins. Andy Carroll, Jack Wilshere og Andryi Yarmolenko eru þegar á meiðslalista og væri ekki mikið vit í því að bæta við öðrum leikmanni á háum launum á þann lista.
Athugasemdir