Mourinho og lærisveinar hans töpuðu fyrir Manchester City um helgina, 3-1, í nágrannaslag.

Sutton sagði muninn á liðunum svakalegan en hann segir að United þurfi alvarlega að íhuga að skipta um stjóra til þess að ná árangri.

United er í áttunda sæti deildarinnar og hefur fengið á sig 21 mark í fyrstu tólf leikjunum.

„United var skólað til í þessum leik. Þetta var eins og að horfa á Manchester City gegn varaliðinu. Það er svakalegur gæðamunur á þessum liðum og það breytist ekki fyrr en United skiptir um stjóra," sagði Sutton.

„Það sem sjokkeraði mig hvað mest eru ummæli Mourinho eftir leikinn þar sem hann hagaði sér eins og smábarn. Hvenær linnir þessu?" sagði Sutton og spurði en hann vísar þar í ummæli Mourinho þar sem hann sagði City hafa fengið auðveldan undirbúning fyrir leikinn með tveimur vináttuleikjum. Hann er að tala um leikina gegn Southampton og Shakhtar Donetsk og féllu ummælin ekki í kramið hjá Sutton.