Hasenhuttl: Bæting á frammistöðunni

„Í okkar stöðu er hver einasti leikur gríðarlega mikilvægur," segir Ralph Hasenhuttl, stjóri Southampton.

„Það er komið gott sjálfstraust í liðið og við teljum að við hefðum átt skilið að fá eitthvað úr leiknum gegn Newcastle (2-1 tap). Við fengum tækifæri á að taka eitthvað á erfiðum útivelli."

„Frammistaða okkar er að verða betri. Tvö góð úrslit á heimavelli hafa hjálpað gríðarlega og núna eigum við annan heimaleik."

Megum ekki glutra niður forystu
Danny Ings kom Southampton yfir gegn Newcastle á sunnudag en heimamenn unnu á endanum 2-1.

„Við höfum skoðað spilamennsku okkar eftir að við tókum forystuna. Við sýndum mikið hugrekki en hefðum átt að spila með öðrum hætti eftir að við komumst yfir," segir Hasenhuttl.

„Hluti af framþróun okkar er að koma í veg fyrir að við gefum stig frá okkur þegar við erum yfir í leikjum."

Pellegrini veit hvað þarf
Kollegi Hasenhuttl hjá West Ham, Manuel Pellegrini, er í heitu sæti og talað um að Hamrarnir gætu skipt um stjóra ef liðið tapar leiknum á laugardag.

„Ég tel hann vera magnaðan stjóra. Hann býr yfir mikilli reynslu og eins og hjá öllum þá koma kaflar þar sem gengið er ekki nægilega gott. Ég tel að hann viti hvað þurfi að gera því hann býr yfir mikilli reynslu," segir Hasenhuttl.