Argentínski miðjumaðurinn fyrrverandi Esteban Cambiasso átti góðan feril og þá sérstaklega á tíma sínum hjá Inter þar sem hann lék í áratug.
Cambiasso lék lykilhlutverk er Inter vann þrennuna undir stjórn Jose Mourinho árið 2010 og eru margir sem telja Juventus geta endurtekið verkið í ár.
Cambiasso telur þó ekki sanngjarnt að líkja árangri Inter 2010 við árangur Juventus núna.
„Það er ekki hægt að líkja þessu Juventus liði við Inter á sínum tíma. Við vorum ekki með stórstjörnu eins og Cristiano Ronaldo eða Messi, sem eru tveir afar einstakir leikmenn sem geta gert gæfumuninn," sagði Cambiasso við Sky Sport Italia.
„Þess í stað vorum við með leikmann eins og Eto'o, sem kom til okkar eftir að hafa unnið þrennuna með Barcelona.
„Ólíkt Juve komum við ekki til baka á þennan hátt en það var mikilvægt að slá Chelsea úr leik þegar enginn taldi okkur eiga möguleika.
„Það er einfaldlega ekki hægt að líkja þessum liðum saman."
Athugasemdir
