Fjölnismenn þurftu að sætta sig við tap á heimavelli gegn sterku liði Víkings Ó. Það þýðir að Ólsarar taka fram úr þeim á toppi deildarinnar og Fjölnismenn hafa mikið til að sanna í næstu leikjum.
Lestu um leikinn: Fjölnir 1 - 3 Víkingur Ó.
Ásmundur Arnarsson þjálfari Fjölnis var ekki sáttur með fyrri hálfleikinn hjá sínum mönnum í kvöld, en báðir þjálfarar voru sammála um að leikurinn hafi ráðist í honum.
„Það sem fór úrskeiðis var helst slakur fyrri hálfleikur, Ólsararnir komu gríðarlega grimmir til leiks og komust upp með það lengi vel. Í fyrri hálfleik var bara eitt lið á vellinum“
Leikur Fjölnismanna skánaði mikið í seinni hálfleik, en leikurinn tapaðist samt sem áður.
„Mér fannst við eiga ágætis seinni hálfleik, en það dugði bara ekki til.“
Hans Viktor Guðmundsson fór út af á börum í seinni hálfleik, Ásmundur segist ekki vita meira um hans meiðsli að svo stöddu.
„Þeir náðu að tækla hann út úr leiknum án þess að fá neitt fyrir það og við misstum svolítið dampinn eftir að hann fór út af.“
Athugasemdir