Ætlar að koma með bronsið heim.
Gareth Southgate, landsliðsþjálfari Englands, ætlar ekki að gera margar breytingar á byrjunarliðinu fyrir leikinn gegn Belgíu á morgun en liðin eigast þá við í leik um 3. sætið á HM.
England fór í framlengingu gegn Króatíu í fyrradag en Southgate vill ekki breyta miklu.
„Allir vilja spila en stundum er ekki góð ákvörðun að láta menn spila ef orkan er ekki til staðar. Þetta verður ekki sama byrjunarlið en við viljum gera eins fáar breytingar og mögulegt er," sagði Southgate.
„Við höfum til mikils að vinna. Við eigum möguleika á medalíu á HM og það er eitthvað sem einungis eitt enskt lið hefur áður náð að gera."
„Belgar unnu okkur líka um daginn svo við viljum kvitta fyrir það. Tilfinningalega hafa þetta verið erfiðir dagar en leikmennirnir eru ótrúlegir. Það er frábært að vinna með þeim. Þeir hafa orku og vilja."
Athugasemdir
