Eggert á æfingu í Katar í dag.
„Leikurinn gegn Svíum var fínn. Við spiluðum vel, sérstaklega í fyrri hálfleik. Heilt yfir voru góðir punktar í þessu. Það var gott að fá markið í endann og byrja árið ekki á tapi," segir Eggert Gunnþór en hann var í byrjunarliðinu í leiknum.
Íslenska liðið mætir Eistlandi á morgun í Katar og er Eggert bjartsýnn á sigur í þeim leik.
„Jájá. Við erum búnir að skoða þá aðeins og þeir eru með reyndara lið en við. Við náum vonandi bara að byggja á því sem að við vorum að gera vel á móti Svíum og ná í sigur snemma á árinu."
Eggert spilar með SønderjyskE í dönsku úrvalsdeildinni en þar er vetrarfrí núna.
„Það hefur gengið fínt. Við erum um miðja deild og við vorum að skipta um þjálfara. Vonandi kemur hann með auka kraft og við náum að rífa okkur upp í topp sex. Ég spila alla leiki og það hefur gengið vel persónulega."
Samningur Eggert við félagið rennur út í sumar en hann gæti framlengt samning sinn.
„Ég er mjög sáttur. Ég á hálft ár eftir af samningi og reikna með að við setjumst niður fljótlega eftir janúar og sjáum hvað setur. Mér líður mjög vel innan og utan vallar," sagði Eggert.
Viðtalið við Eggert má sjá í heild sinni hér að ofan.
Athugasemdir
