Agla María Albertsdóttir skoraði fyrsta mark leiksins á 39. mínútu og kom Breiðablik yfir. Agla var þarna að skora gegn sínum gömlu félögum en hún gekk til liðs við Breiðablik frá Stjörnunni fyrir síðasta tímabil.

Fleiri mörk voru ekki skoruð í fyrri hálfleik og það voru því Blikar sem að leiddu í hálfleik.

Hin unga Bergþóra Sól Ásmundsdóttir tvöfaldaði forystu Breiðabliks þegar tæpar tuttugu mínútur voru eftir af leiknum. Bergþóra er fædd árið 2003 og lék með Augnablik síðasta sumar.

Lokatölur í Fífunni í kvöld, 2-0, Breiðablik í vil sem er með sex stig eftir tvo leiki. Stjarnan með fjögur stig eftir fjóra leiki.