Spánn: Alvarez með tvö vítaspyrnumörk í sigri Atlético

Atlético Madríd er nú nær því að tryggja sér þátttöku í Meistaradeild Evrópu á næstu leiktíð eftir 4-2 sigur liðsins á Real Valladolid á Wanda Metropolitano-leikvanginum í Madríd í kvöld.

Vítaspyrnur voru þema kvöldsins. Valladolid komst yfir úr einni slíkri á 21. mínútu er Clement Lenglet handlék boltann eftir hornspyrnu og skoraði Mamadou Sylla úr vítinu.

Argentínumaðurinn Julian Alvarez skoraði sjálfur úr víti aðeins fjórum mínútum síðar er brotið var á Giuliano Simeone í teignum.

Simeone gerði annað mark Atlético tveimur mínútum síðar með laglegu skoti og fóru heimamenn inn í hálfleikinn með eins marks forystu.

Javi Sanchez náði að bæta upp fyrir brot sitt í vítaspyrnu Atlético með því að gera annað mark Valladolid snemma í síðari hálfleiknum en Atlético hélt áfram að pressa og uppskar tvö mörk á síðustu tuttugu mínútunum.

Þriðja vítaspyrnan var dæmd á 70. mínútu er Henrique braut á Marcos Llorente og skoraði Alvarez annað vítaspyrnumark sitt.

Varamaðurinn Alexander Sorloth gerði síðan út um leikinn er hann hirti frákast eftir að markvörður Valladolid varði skot Rodrigo Riquelme út í teiginn.

Atlético er í 3. sæti með 63 stig og með tólf stig á Villarreal sem er í Evrópudeildarsæti þegar sjö leikir eru eftir. Madrídarliðið er þá aðeins þremur stigum frá nágrönnum sínum í Real Madrid, sem sitja í öðru sæti. Fall blasir á meðan við Valladolid sem er á botninum með aðeins 16 stig.