Kylian Mbappe verður þriðji táningurinn í sögunni til að spila í úrslitaleik HM þegar Frakkland spilar við Króatíu á morgun.
Mbappe hefur verið einn besti maður mótsins í Rússlandi og ef Frakkland vinnur á morgun er hann líklegur til þess að verða valinn besti leikmaður mótsins.
Mbappe verður í byrjunarliði Frakklands á morgun, það er alveg ljóst og þegar hann stígur út á völlinn mun hann fylgja í fótspor Pele sem var fyrsti táningurinn til að spila í úrslitaleik HM með Brasilíu árið 1958. Pele, sem var 17 ára, fór fyrir liði Brasilíu sem vann Svíþjóð örugglega í úrslitaleiknum.
Pele var eini táningurinn sem hafði spilað í úrslitaleiknum þangað til 1982 Giuseppe Bergomi spilaði með Ítalíu gegn Vestur-Þýskalandi í Madríd. Bergomi, sem var þá 18 ára, spilaði allan leikinn þegar Ítalía vann sinn þriðja Heimsmeistaratitil.
Mun hinn 19 ára gamli Mbappe hjálpa Frakklandi að vinna sinn annan Heimsmeistaratitil á morgun?
Athugasemdir