Láki: Fannst við geta skorað fleiri mörk

„Þetta er þriðji leikurinn á átta dögum fyrir okkur, maður var helst smeykur við orkustigið í leiknum en við kláruðum þetta mjög vel. Fyrri hálfleikurinn var mjög góður, mér fannst við geta skorað fleiri mörk," sagði Láki.

„Við komum þeim á óvart með fyrstu pressunni okkar. Þeir spiluðu betur í seinni hálfleik og gátu saxað á þetta, mér fannst við geta gert betur í skyndisóknunum en á endanum var þetta sanngjarn sigur."

Frábær fyrri hálfleikur hjá Þór en HK var meira með boltann í þeim síðari. Leið þér vel í síðari hálfleik?

„Nei ég get ekki sagt það, þeir eru með feykilega gott lið. Við náðum að slökkva á þeim einn á einn, varnarleikurinn frá fremsta að aftasta manni var mjög góður," sagði Láki.