Neymar hefur verið þekktur sem einn af bestu knattspyrnumönnum heims í nokkur ár en eftir HM er hann heimsþekktur fyrir leikaraskap, enda var hann einn stærsti brandari sumarsins á helstu samfélagsmiðlum.

Í lok júlí var Neymar partur af auglýsingaherferð Gillette og viðurkenndi þar að hann hafi stundum gert úlfalda úr mýflugu þegar brotið var á honum í Rússlandi. Hann fékk mikla gagnrýni fyrir auglýsingaherferðina.

Alves býst við að gagnrýnin muni hjálpa Neymar að þroskast og gera hann að meiri fagmanni.

„Stundum gerast hlutir í lífinu sem hjálpa manni að þroskast. Þá áttar maður sig á því að maður verður að bæta sig sem atvinnumann," sagði Alves.

„Ég tala mikið við Neymar og ég held hann hafði öðlast reynslu af þessu. Öll litlu skotin sem hann fékk á sig í kringum HM munu gera hann enn þroskaðari. Við munum sjá breytingar á hegðun hans."

Neymar virtist þó ekki læra mikið af heimsmeistaramótinu en hann var aftur brandari vikunnar í nýliðnu landsleikjahlé.

Fyrst fór myndband af DeAndre Yedlin sem eldur um sinu á samfélagsmiðlum. Þar dæmdi dómarinn brot á Yedlin eftir samskipti við Neymar og mótmælti bakvörðurinn með að spyrja dómarann hvort hann hafi ekki örugglega horft á HM.

Nokkrum dögum síðar fékk hann gult spjald fyrir leikaraskap gegn El Salvador. Eftir leik var Neymar ósáttur og sagði bandaríska dómarann hafa sýnt sér óvirðingu með að spjalda sig.

„Þú skilur krakkann eftir og verður að manni. Þegar þú verður að manni þá byrjarðu að leggja meiri alvarleika í allt sem þú gerir," hélt Alves áfram.

„Ég sagði við hann að ef allir eru að segja sama hlutinn við þig, ekki bara ein eða tvær manneskjur, þá ertu að gera eitthvað rangt. "