Það mun öll athygli beinast að Cristiano Ronaldo þegar hann mætir aftur í Leikhús draumanna með liði sínu Juventus í næstu viku. Manchester United tekur þá á móti ítalska risanum í riðlakeppni Meistaradeildarinnar.
Juventus hefur unnið báða sína leiki í riðlakeppninni gegn Young Boys og Valencia. Manchester United vann útisigur gegn Young Boys en gerði jafntefli við Valencia á Old Trafford.
Romelu Lukaku framherji Manchester liðsins segir að það liggi í augum uppi að það þurfi að hafa sérstakar gætur á Ronaldo en nefnir þó tvo aðra leikmenn Juventus sem hann telur að þurfi að vera vakandi fyrir.
„Ronaldo er í öðrum klassa en aðrir. Dybala er leikmaður sem verður sterkari með hverjum leiknum virðist vera, ég er mikill aðdáandi. Douglas Costa hefur sýnt það í gegnum sinn feril að hann getur unnið leiki upp á sitt einsdæmi."
„Juventus er frábært lið með frábæran þjálfara. Bekkurinn er frábær og það er valinn maður í hverju rúmi."
Athugasemdir