Talið er Sergio Ramos muni nær örugglega vera dæmdur í lengra bann af UEFA eftir að myndskeið kom upp á yfirborðið þar sem hann spyr Real Madrid bekkinn að því hvort hann eigi viljandi að næla sér í gult spjald.

Atvikið átti sér stað í 2-1 útisigri Real gegn Ajax í Meistaradeildinni en í lok leiks fékk Ramos gult fyrir brot á Kasper Dolberg.

Ramos hafði áður fengið tvö gul í keppninni og missir því af seinni leiknum gegn Ajax. Spjaldið ætti þó að tryggja að hann sé með hreinan skjöld í 8-liða úrslitunum.

Strax eftir leikinn viðurkenndi Ramos í viðtali við spænskan fjölmiðlamann að hafa vísvitandi nælt sér í spjaldið.

„Ég væri að ljúga að þér ef ég segði að hefði ekki viljandi fengið spjaldið," sagði Ramos.

En nokkrum klukkustundum seinna dró hann í land á samfélagsmiðlum. Hann sagði særandi að vera sakaður um að hafa fengið spjaldið viljandi.

UEFA hefur hafið rannsókn á málinu en ef talið er að Ramos hafi viljandi fengið gula spjaldið þá verður bannið lengra en einn leikur.