„Bara ekki nógu gott. Svipað leik okkar við Tindastól að mörgu leyti þar sem við stjórnum leiknum og höldum boltanum. Slæmar ákvarðanir á síðasta þriðjungi vallarins, gáfum þeim hornið sem leiddi af sér fyrsta markið og þetta er eitthvað sem við þurfum að laga.“ Sagði Nik Chamberlain svekktur þjálfari Þróttar um sín fyrstu viðbrögð eftir 2-2 jafntefli hans kvenna gegn Keflavík fyrr í dag.
Lestu um leikinn: Keflavík 2 - 2 Þróttur R.
Þróttur var undir þegar blásið var til hálfleiks en eftir um 10 mínútna leik í síðari hálfleik höfðu þær snúið taflinu við og leiddu 2-1. Það dugði þó ekki til og jafnaði Keflavík á 66. mínútu leiksins.
„Fyrstu 15 mínúturnar í síðari hálfleik voru frábærar hjá okkur. Mjög góð mörk og aukin vilji sem ég bað um en í kjölfarið féllum við í þann hugsunarhátt að halda að þetta yrði auðvelt í stað þess að ganga frá leiknum. Fengum vissulega færin en svo var það bara ein skyndisókn eftir færi hjá okkur sem við hefðum átt að gera betur úr.“
Deildin hefur farið ögn öðruvísi af stað en margir bjuggust við fyrir mót og virðist sem hún sé mun jafnari í ár en oft áður. Um þetta sagði Nik.
„Ég sagði við stelpurnar að við ættum að vera með 6-7 stig og eftir sigur Tindastóls eru þær komnar uppfyrir okkur. Það mun ekki þurfa nema 1-2 leiki og lið munu hoppa upp og niður töfluna en allt sem við getum gert er að horfa í frammistöðuna og vonandi breyta þessum jafnteflum í sigra.“
Sagði Nik en allt viðtalið má sjá í spilararnum hér að ofan
Athugasemdir