Heimir var til að mynda spurður út í þá hefð sem skapast hefur undanfarin ár að Heimir heimsæki stuðningsmenn Íslands á Ölveri fyrir leiki á Laugardalsvellinum og tilkynni þeim byrjunarlið Íslands og fari aðeins yfir komandi leik.

„Þetta er eitt af því sem við gerum öðruvísi. Við erum nær stuðningsmönnum en aðrir þjálfarar og leikmenn vegna fólksfjöldans. Það er traust liðsins gagnvart stuðningsmönnum sem gerir okkur það kleift að geta þetta," sagði Heimir og hélt áfram.

„Ég skil að þetta er skrýtið í augum aðra þjóða og gæti líklega hvergi annars staðar viðgengist en þetta sýnir traustið sem er. Þar sem við erum svona fámenn þá reynum við að nýta jákvæðnina sem er í gangi. Stuðningsmennirnir finnst þeir eiga part í liðinu."

Að lokum ákvað Heimir að koma þeim skilaboðum áleiðis að hann myndi þó ekki fara á bar á morgun fyrir leikinn gegn Argentínu.

„Leikurinn er svo snemma á morgun svo ég fer ekki á neina krá á morgun."