Heimsmeistarar Frakklands byrja Evrópumeistaramótið 2020 vel en liðið spilaði opnunarleik sinn í kvöld.

Verkefnið var alls ekki auðvelt fyrir Frakka sem mættu Þýskalandi - spilað var á Allianz Arena vellinum í Munchen.

Margir spá Frökkum sigri í þessu móti og þeir ollu engum vonbrigðum í 1-0 sigri á þeim þýsku.

Eina mark leiksins var skorað á 20. mínútu er Mats Hummels skoraði nokkuð klaufalegt sjálfsmark fyrir Þýskaland.

Kylian Mbappe og Karim Benzema bættu við mörkum fyrir Frakka í seinni hálfleik en þau voru bæði dæmd af vegna rangstöðu.

Þýskaland fékk afar takmarkað magn af tækifærum og hefur liðið oft virkað meira sannfærandi.

Þetta er í fyrsta sinn sem Þýskaland tapar opnunarleik sínum á EM.