Zlatko Dalic, landsliðsþjálfari Króatíu var allt annað en sáttur með ákvörðun dómarans að dæma víti sem leiddi til annars marks Frakklands í úrslitaleik heimsmeistaramótsins í dag.
Staðan var 1-1 seint í fyrri hálfleik þegar hornspyrna Antoine Griezmann fór í hendi Ivan Perisic. Dómarinn Nestor Pitana ákvað upphaflega að gera ekkert í málinu en eftir að hafa nýtt sér VAR dómgæsluna snerist honum hugur.
Dalic greindi skýrt og greinilega frá óánægju sinni með dóminn og var ekki sáttur.
„ Við spiluðum vel en vítið kýldi úr okkur allan vind og eftir það var þetta mjög erfitt. Ég vil bara segja eina setningu um þetta víti. Þú gefur ekki vítaspyrnu á svona hátt í úrslitaleik HM.” sagði Dalic.
„Við vildum vinna heimsmeistaramótið svo mikið en svona er fótboltinn. Frakkarnir komu okkur ekki á óvart, við gáfum tvö einföld mörk auk sjálfsmarks og vítaspyrnunnar. Við höfðum ekki heppnina með okkur í dag. Þegar þú færð á þig fjögur mörk getur þú ekki búist við því að vinna leikinn.”
Athugasemdir