Marjani Hing-Glover meiddist illa og þurfti að yfirgefa Kaplakrika í sjúkrabíl eftir að hún lenti í samstuði í leik gegn Grindavík síðastliðinn þriðjudag. Óttast var að sóknarmaðurinn öflugi væri fótbrotin en nú er komið í ljós að svo er ekki.
„Marjani fór úr ökklalið en er sem betur fer ekki brotin. Hún verður frá keppni í einhverjar vikur en nær vonandi síðustu leikjunum,“ sagði Orri Þórðarson, þjálfari FH, þegar Fótbolti.net spurði hann út í meiðslin.
Fjarvera Marjani verður blóðtaka fyrir FH en hún er markahæsti leikmaður liðsins og algjör lykilkona í þeirra sóknarleik.
Þá meiddist Helena Ósk Hálfdánardóttir í þarsíðasta leik liðsins, gegn Stjörnunni. Þau meiðsli litu einnig afar illa út og jafnvel talið að um krossbandaslit væri að ræða. Nú er ljóst að Helena er með rifu í liðþófa í hné en enn er þó óvíst hversu alvarleg meiðslin eru og hvenær hún getur snúið aftur á völlinn.
Þá eru þær Maria Selma Haseta, Rannveig Bjarnadóttir og markvörðurinn Tatiana Saunders enn á sjúkralistanum hjá FH en allar á batavegi.
FH á mikilvægan leik gegn HK/Víkingum næstkomandi þriðjudag en liðið er í fallsæti þegar mótið er hálfnað og þarf nauðsynlega á stigum að halda.
Athugasemdir