Argentína spilaði ekki vel á HM og rétt komst í 16-liða úrslitin í riðli með Króatíu, Nígeríu og Íslandi. Þegar fimm mínútur voru eftir í síðasta leik hefði Ísland hæglega getað stolið sætinu af Argentínu en svo fór að Argentína komst áfram.

Í 16-liða úrslitunum töpuðu Messi og félagar fyrir Frakklandi.

Á meðan Argentína var með á HM bárust fjölmargar fréttir af því að Sampaoli væri búinn að missa traustið hjá leikmönnum sínum og hann væri orðinn valdalaus.

Í frétt Marca segir að náðst hafi samkomulag í gærkvöldi um starfslokasamning Sampaoli.

Þegar Sampaoli tók við í fyrra gerði hann fimm ára samning og hann fær því ágætlega borgað þótt hann verði ekki áfram landsliðsþjálfari. Hann fær víst 2 milljónir dollara, sem er þó minna en hann hefði getað fengið.

Argentína fær því enn og aftur nýjan landsliðsþjálfara.

Síðustu landsliðsþjálfarar Argentínu:
2006: Jose Pekerman
2006: Alfio Basile
2008: Diego Maradona
2010: Sergio Batista
2011: Alejandro Sabella
2014: Gerardo “Tata” Martino
2016: Edgardo Bauza
2017: Jorge Sampaoli