Ísland tapaði 2-1 fyrir Sviss í Þjóðardeild UEFA á Laugardalsvelli í kvöld. Kári Árnason miðvörður landsliðsins sagði að fyrsta markið hafi gjörbreytt leiknum þar sem erfitt er að ráða við Sviss þegar þeir komast yfir.
Lestu um leikinn: Ísland 1 - 2 Sviss
„Fyrsta markið breytir þessu algjörlega, þetta er lið sem þú mátt ekki lenda undir gegn, þá geta þeir haldið boltanum þar til sólin sest. Þeir teygja á okkur og þá opnast fyrir Shaqiri en við náum svo að loka á það eftir annað markið. Þá fer ég upp á hann og skil Ragga einn eftir með framherjann sem maður gerir ekki undir eðlilegum kringumstæðum en við þurftum að taka sénsa."
Kári segir að síðasta landsleikjahlé hafi bara verið einsdæmi og nú erum við að sjá þeirra rétta andlit þótt úrslitin eigi enn eftir að detta fyrir liðið.
„Auðvitað, þetta var bara „one off" en engu að síður þá erum við ekki að ná úrslitum eins og við gerðum og það er kannski af því lið eru farinn að bera meiri virðingu fyrir okkur og vita fyrir hvað við stöndum."
Kári er með skilaboð til þjóðarinnar þar sem hann segir að þeir eigi mikið inni og ætli sér að komast á Evrópumótið.
„Við skulum alveg gera okkur grein fyrir því við hvaða lið við höfum verið að spila gegn undanfarið, þetta er stór lið sem við eigum alls ekki að valta yfir. Ég bið Íslensku þjóðina að gefast ekki uppá okkur, það er nóg eftir af þessu og við ætlum okkur að komast á EM."
Athugasemdir