14 ára drengur lést þegar keyrt var yfir hann eftir sigur Frakka

Keyrt var yfir fjórtán ára dreng og hann lést í frönsku borginni Montpellier, skömmu eftir að Frakkland vann Marokkó í undanúrslitaleik á HM.

Drengurinn lést á sjúkrahúsi en myndir og myndskeið á samfélagsmiðlum sýna þegar atvikið átti sér stað. Franski fáninn var festur við bílinn en hópur fólks reif fánann af bílnum.

Örvænting virðist þá grípa um sig hjá bílstjóranum sem keyrir inn í tvo táninga, hann tekur beygju og gefur í. Fjórtán ára strákur varð fyrir bílnum og fór í hjartastopp.

Bifreiðin fannst yfirgefin ekki langt frá atvikinu og lögreglan leitar bílstjórans.

Það var mikil spenna milli stuðningsmanna Frakklands og Marokkó í borgum Frakklands og lögreglan þurfti að notast við táragas. Um 1,5 milljón Marokkómenn búa í Frakklandi.