Nuno Espirito Santo var gríðarlega ánægður eftir sigur Wolves gegn Manchester United í enska bikarnum í kvöld.
Úlfarnir unnu sér inn sæti í undanúrslitunum með sigrinum frækna þar sem þeir geta mætt Manchester City, Watford eða Millwall/Brighton sem etja kappi á morgun.
„Ég er mjög stoltur af strákunum, við sýndum okkar bestu hliðar og uppskárum frábæran sigur. Þetta þýðir mikið fyrir félagið, við vitum vel hvað Wolves afrekaði á sjötta og sjöunda áratugnum. Við vitum að það eru einhverjir áhorfendur uppi í stúku sem muna eftir þeim tímum og við erum stoltir að endurvekja þær minningar," sagði Espirito Santo.
„Þetta verður mikið erfiðara í ár en við ætlum að reyna að fara alla leið, einn leik í einu. Við munum halda áfram að spila á sömu mönnum, það er ákvörðun sem var tekin í glugganum í janúar.
„Við erum að nota 16 leikmenn, ég hef mikla trú á að það sé hægt að afreka mikið með lítinn leikmannahóp. Auðvitað fylgja þessu ýmsar áhættur en við ætlum að klára tímabilið svona."
Athugasemdir