Elísabet Gunnarsdóttir.
Elísabet Gunnarsdóttir mun stýra Kristianstad í úrslitum sænsku bikarkeppninnar. Þetta er í annað sinn sem Kristianstad kemst í bikarúrslit undir stjórn Elísabetar. Síðast gerðist það 2014, en þá tapaði liðið gegn Linköping í úrslitaleiknum.
Kristianstad vann 2-1 sigur gegn Pitea, sem varð deildarmeistari í Svíþjóð á síðustu leiktíð, í dag.
Sif Atladóttir, Þórdís Hrönn Sigfúsdóttir og Svava Rós Guðmundsdóttir voru allar í byrjunarliði Kristianstad og hjálpuðu liðinu að komast í úrslitaleikinn.
Svava Rós lagði upp bæði mörk Kristianstad í leiknum.
Mótherjinn í úrslitaleiknum verður Göteborg sem vann Íslendingalið Djurgården eftir framlengingu. Guðrún Arnardóttir og Ingibjörg Sigurðardóttir léku með Djurgården í leiknum. Guðbjörg Gunnarsdóttir var ekki með vegna meiðsla.
Nú verður spennandi að sjá hvort Elísabet nái að stýra Kristianstad til fyrsta bikarmeistaratitilsins í sögu félagsins.
Athugasemdir
