Gladbach er komið uppfyrir RB Leipzig og í þriðja sæti þýsku deildarinnar eftir góðan sigur gegn Frankfurt í dag.

Frönsku framherjarnir Alassane Plea og Marcus Thuram skoruðu fyrstu mörkin snemma leiks og verðskulduðu gestirnir að fara inn í leikhlé með tveggja marka forystu.

Heimamenn fundu engin svör í síðari hálfleik og gerði Rami Bensebaini út um viðureignina með marki úr vítaspyrnu á 72. mínútu.

Portúgalski sóknarmaðurinn Andre Silva minnkaði muninn á 81. mínútu en það dugði ekki til.

Gladbach er þremur stigum frá toppliði FC Bayern, sem á leik til góða, eftir sigurinn.
Þetta var fjórða tap Frankfurt í röð og er liðið fimm stigum fyrir ofan fallsvæðið.