„Þetta er ekki toppurinn. Þetta eru frábær úrslit fyrir okkur, við hefðum kannski tekið þessi úrslit fyrir leikinn," sagði varnarmaðurinn Ragnar Sigurðsson eftir 1-1 jafntefli Íslands gegn Argentínu í fyrsta leik landsliðsins á HM í Rússlandi.
„Við hefðum getað gert enn betur, þetta var fyrsti leikurinn og við spiluðum varnarsinnað, meira en við ætluðum okkur. Við verðum að átta okkur á því að við erum að spila við bestu leikmenn í heimi. Við gerðum það sem þurfti til að ná í stig," sagði Raggi sem viðurkennir að það sé erfitt að kljást við svona heimsklassa leikmenn eins og eru í argentíska liðinu. Hann hafi til að mynda fundið fyrir því í markinu sem Sergio Aguero skoraði.
„Ég geri mistök í markinu. Ég reyni að fara í boltann í stað þess að standa með honum og ég missi hann hálft skref frá mér. Ég hreinlega skil ekki hvernig hann nær að troða þessum bolta upp í samskeytið. Þetta er munurinn sem við erum að tala um."
Raggi segist hafa liðið vel inn á vellinum og ekkert stress hafi verið í liðinu þrátt fyrir að Argentína hafi verið mikið með boltann í leiknum.
„Það er auðveldara að verjast svona heldur en að lenda einn á móti einum í einhverju kapphlaupi. Við í öftustu varnarlínunni eru mjög meðvitaðir í þessari stöðu. Þetta verður mjög mikið hlaup fyrir miðjumennina okkar. Ég held að við verðum að komast aðeins framar á völlinn og ná að spila meiri sóknarbolta í næsta leik svo strákarnir fyrir framan verða ekki búnir á því."
„Við höfum sýnt það hingað til að við getum unnið hverja sem er, við ætluðum okkur sigur í þessum leik en við tökum stigið miðað við hvernig leikurinn spilaðist," sagði Ragnar Sigurðsson að lokum.
Athugasemdir