Liverpool vann leikinn 3-1 þar sem Xherdan Shaqiri kom inn af bekknum og skoraði tvennu.

Klopp hrósaði Shaqiri að leikslokum og sagðist vera ánægður með að sjá hann gera herslumuninn.

„Þetta var stórkostlegt, við vorum við stjórn allan tímann. Við ýttum þeim, við vorum grimmir, við unnum boltann aftur, við vorum hugrakkir, við gáfum góðar stungusendingar," sagði Klopp.

„Í seinni hálfleik vorum við að reyna og reyna að skora þangað til Shaq kom inn og skoraði tvennu. Það var magnað, hann er stórkostlegur leikmaður.

„Við áttum smá samtal vegna þess að hann var hættur að skipta jafn mikið sköpum og áður eftir glæsilega byrjun hjá félaginu. Vinstri fóturinn hans er gerður til að skipta sköpum, og skjóta."

Nathaniel Clyne kom inn í liðið í fjarveru James Milner, Trent Alexander-Arnold og Joe Gomez og stóð sig vel í hægri bakverði. Þetta var hans fyrsti deildarleikur á tímabilinu.

„Þvílíkur leikur sem hann átti, vá. Desember er hálfnaður og hann er að spila sinn fyrsta deildarleik á tímabilinu, ég ber mikla virðingu fyrir frammistöðu hans í dag."

Liverpool er á toppi ensku úrvalsdeildarinnar, einu stigi fyrir ofan Manchester City. Man Utd er í sjötta sæti, ellefu stigum frá Meistaradeild.