„Ég er alveg þokkalega sáttur við frammistöðu minna manna í leiknum í dag," sagði Ási eftir leikinn í dag.

Leikurinn var hraður, menn tókust á og segir Ási að dómarinn hafi ekki haft stjórn á leiknum.

„Ef við einbeitum okkur að okkar frammistöðu að þá var hún þokkaleg. Mér fannst við eiga að vinna þennan leik, við fengum þrjú dauðafæri í seinni hálfleik og frammistaðan heilt yfir þannig að ég hefði viljað fá sigur,"

Fjölnir er á leiðinni í æfingaferð erlendis en hvernig ætlar Ási að nýta vikurnar fram að móti?

„Við erum að þétta raðirnar og slípa liðið til. Veturinn er búinn að vera ágætur en við þurfum að stíga upp. Við þurfum að vinna í nokkrum atriðum til að geta komið með gott lið inn í mótið. Við höfum ekki langan tíma í það svo að við þurfum að nýta vikurnar mjög vel."

Ási segir að Fjölnir ætli að gera atlögu að því að komast í Pepsi-deildina í sumar.

„Auðvitað vilja menn komast sem fyrst aftur í úrvalsdeildina og við reynum að gera atlögu að því eins og sjálfsagt flest öll liðin í deildinni."

Albert Brynjar Ingason var ekki í leikmannahópi Fjölnis í dag.

„Við erum að spara Albert. Hann er kominn til ára sinna og við ætlum að hafa hann góðan í sumar," sagði Ási að lokum léttur.