Pólski framherjinn Robert Lewandowski skoraði 40. mark sitt á tímabilinu í 2-0 sigri Bayern München á Union Berlín í þýsku deildinni í dag. Þetta er fimmta tímabilið í röð sem hann skorar 40 mörk eða meira.
Borussia Dortmund keypti Lewandowski frá Lech Poznan árið 2010 en hann gerði 9 mörk á fyrstu leiktíðinni sinni með Dortmund og eftir það fór vélin að malla.
Hann skoraði samtals 103 mörk í 187 leikjum með Dortmund áður en hann var keyptur til Bayern. Lewandowski skoraði 25 mörk á fyrsta tímabilinu hjá Bayern en hann hefur komist yfir 40 marka múrin á öllum tímabilum sínum með liðinu síðan.
Tímabilið 2015/2016 skoraði hann 42 mörk og svo 43 mörk tímabilið á eftir. Hann gerði 41 mark tímabilið 2017/2018 og 40 mörk á síðustu leiktíð.
Hann skoraði fyrra mark Bayern í dag úr vítaspyrnu og gerði þar með 40. mark sitt á tímabilinu í öllum keppnum. Fimmta tímabilið í röð en í heildina er hann með 231 mark í 276 keppnisleikjum með Bayern sem er ótrúleg tölfræði.
Athugasemdir