Þeir eru nokkrir Belgarnir sem eru að renna út á samningi og hafa landsliðsfélagar Romelu Lukaku verið orðaðir í Inter.

Dries Mertens, Jan Vertonghen og Thomas Meunier, sem leika fyrir Napoli, Tottenham og PSG, verða allir samningslausir í sumar og því falir á frjálsri sölu.

Mertens er flinkur framherji sem leikur fyrir Napoli, Vertonghen er fjölhæfur varnarmaður Tottenham og Meunier stæðilegur hægri bakvörður PSG.

Lukaku er sagður ætla að leggja sitt af mörkum til að sannfæra þá um að spila með sér í ítalska boltanum, þar sem Inter er í þriðja sæti sem stendur níu stigum eftir toppliði Juventus en með leik til góða.

Annar Belgi sem gæti sinnt hlutverki hjá Inter á næstu leiktíð er Radja Nainggolan, sem hefur verið frábær að láni hjá Cagliari á tímabilinu.