Messi segir að það hefði breytt leiknum hefði hann skorað. Hannes varði hinsvegar frábærlega frá einum besta leikmanni heims.

„Það hefði breytt handritinu. Það hefði gefið okkur forskot," sagði Messi.

„Augljóslega særir það mig að hafa klikkað á vítaspyrnunni. Þeir hefðu opnast meira og við hefðum getað fundið fleiri svæði. Ég ber ábyrgð á því að við tókum ekki þrjú stig. Ég er ekki í nokkrum vafa um að mark úr vítaspyrnunni hefði breytt öllu."

„Við erum bitrir yfir því að hafa ekki tekið þrjú stig sem við áttum skilið. Að byrja á sigri er alltaf mikilvægt, nú þurfum við að hugsa um leikinn gegn Króatíu."

Hinn magnaði Messi er nú búinn að klúðra fjórum af síðustu sjö vítaspyrnum sínum fyrir Argentínu og Barcelona. Það má þó ekki taka neitt af Hannesi Halldórsyni sem varði frábærlega frá Messi og var valinn maður leiksins.