Skjótt skipast veður í lofti í þjálfaramálum Íslands. Í morgun hætti Heimir Hallgrímsson þjálfari og aðstoðarmaður hans er nú á leið í indversku deildina.
Indverskir fjölmiðlar fullyrða í kvöld að Helgi Kolviðsson sé að taka við þjálfun FC Pune City í indversku deildinni.
Helgi hefur undanfarin tvö ár verið aðstoðarþjálfari Heimis Hallgrímssonar með íslenska landsliðið en Heimir tilkynnti í morgun að hann sé hættur með liðið og leit er hafin að eftirmanni hans.
Ef eitthvað er að marka fréttir indverska miðilsins er ljóst að Helgi ætlar ekki að bjóða sig fram í landsliðsþjálfarastöðuna.
Helgi er 46 ára gamall og hefur mikla reynslu sem aðalþjálfari bæði í Þýskalandi og Austurríki þar sem hann lék einnig meirihluta ferils síns.
Indverska félagið hafði ráðið Brasilíumanninn Marcos Paqueta í stöðu þjálfara fyrir komandi tímabilið en hann rifti samningnum þegar hann fékk tilboð frá Botafogo í heimalandinu.
Austin MacPhee aðstoðarstjóri Hearts í Skotlandi og Paul Le Guen fyrrverandi stjóri Rangers höfðu verið á óskalista Puna áður en nafn Helga komst á blað.
Athugasemdir
