„Þetta var mjög svekkjandi í síðustu umferð og við vildum gera betur. Við ákváðum að koma brjálaðar til leiks og sýna að við erum betri en við vorum í síðasta leik. Ég held við höfum spilað heilt yfir góðan leik,“ sagði Sandra Jessen fyrirliði Þór/KA eftir 4-1 sigur á móti Val á Þórsvellinum í dag.
Lestu um leikinn: Þór/KA 4 - 1 Valur
Þór/KA spilaði vel í dag og uppskar fjögur mörk.
„Mér fannst hann spilast nokkuð vel. Þetta er einn af þeim leikjum sem við héldum vel í boltann og vorum að ná að skipta á milli svæða hægri til vinstri og náum að opna þær þannig. Náum fjórum góðum mörkum inn sem er ekki auðvelt á móti jafn góðu liði og Val.“
Valur gerði sig líklega til að jafna í stöðunni 2-1 en skallamark Örnu Sif drap leikinn.
„Ég held að það hafi drepið allar vonir Vals um að ná jöfnunarmarkinu eftir að við skorum. Auðvitað þurftum við að klára leikinn en samt sem áður gott.“
Þrátt fyrir góðan sigur á móti Val eru úrslitin ráðinn í Pepsí-deild kvenna. Breiðablik vann góðan sigur á Selfoss og eru Íslandsmeistarar. Þór/KA klárar mótið í öðru sæti.
„Auðvitað er maður hundsvekktur að vita að Breiðablik vann Selfoss en við gerðum okkar og kláruðum okkar leik. Þetta var ekki í okkar höndum þannig við þurftum að vona en því miður gekk það ekki eftir. Við erum samt sem áður stoltar, við erum búnar að vinna alla heimaleiki okkar í sumar og það er frábært afrek. Síðan þarf bara að vinna í útileikjunum fyrir næsta sumar.“
Hægt er að horfa á viðtalið í heild sinni hér að ofan.
Athugasemdir