Virgil van Dijk tekur út leikbann á morgun auk þess sem miðverðirnir Joe Gomez og Dejan Lovren eru meiddir. Lovren hefur verið í kapphlaupi við tímann til að ná leiknum en ólíklegt þykir að hann verði í byrjunarliðinu.

Líklegast þykir að miðjumaðurinn Fabinho verði við hlið Joel Matip í hjarta varnarinnar en Henderson hefur einnig verið nefndur til sögunnar.

„Ég myndi gefa allt og ég yrði klár í það," sagði Henderson á fréttamannafundi í dag aðspurður út í það hvort hann geti spilað miðvörð. „Það skiptir ekki máli hvaða stöðu ég er beðinn um að spila. Ég gef 100% og gef allt fyrir liðið."

Henderson tjáði sig einnig um fjarveru Van Dijk. „Auðvitað er það mikill missir, þú getur séð hversu mikilvægur hann er fyrir okkur. Vonandi höfum við nægilega mikil gæði í liðinu til að standa okkur annað kvöld. Vonandi þurfum við ekki að treysta einungis á tvo miðverði í varnarleiknum. Þetta veltur á öllu liðinu."