„Með sigri í leiknum hefðu þeir orðið meistarar. Við höfðum ekki að neinu að keppa og úrslitaleikurinn í Belgíu var framundan hjá okkur," sagði Lárus.

Tengsl voru á milli leikmanna liðanna og nokkrir þeirra ákváðu að semja um úrslit leiksins.

„Á einhverjum tímapunkti sammæltust hópar hjá báðum liðum að bónusarnir sem fengust fyrir að sigra leiki, að við myndum fá þá ef þeir myndu vinna. Í staðinn myndum við ekki leika til sigurs í þessum leik. Ég var aldrei upplýstur um málið þar sem þeim fannst aldrei ástæða til að upplýsa tvítugan Íslending um það að planið væri að vinna ekki leikinn."

Lárus gerði sitt besta í leiknum. Hann hefði átt að fá vítaspyrnu snemma leiks sem dómarinn sleppti á ótrúlegan hátt. Lárus náði að valda usla í vörn Standard Liege í leiknum en á endanum tapaði Genk. Í Miðjunni segist Lárus hafa tekið á móti mútugreiðslum eftir leikinn.

„Einhverjum tíma seinna kemur upp úr kafinu að þarna fóru greiðslur á milli manna. Standard Liege hafði borgað okkur bónusgreiðslur fyrir að vinna ekki þennan leik. Þetta varð stórmál í Belgíu og leikmenn beggja liða voru fluttir til Brussel þar sem við þurftum að ganga í gegnum yfirheyrslur. Þetta var meðhöndlað eins og glæpamál eins og þetta er. Mútumál er svívirðing við íþróttina," sagði Lárus.

Lárus fór í yfirheyrslu á ensku en sá sem yfirheyrði hann var ekki öflugur á enska tungu. „Það féllu strangir dómar í þessu máli en ég ásamt 1-2 öðrum voru sýknaðir. Leikmenn Standard og Genk fengu þunga dóma og voru dæmdir í 1-2 árs keppnisbann," sagði Lárus.

Hér að neðan má hlusta á viðtalið í heild sinni.