„Við teljum okkur vera komnir með meiri reynslu í Evrópuleikjunum heldur en þá og við erum bjartsýnir þannig lagað," sagði Bjössi og ítrekar að öll félögin sem þeir gátu dregist gegn eru gríðarlega sterk.

„Það var kannski BATE, Rosenborg og Maribor sem voru sterkari mótherjar en hin þrjú. Við hefðum mögulega viljað fá eitt af hinum liðunum en það er ekkert hægt að velja í þessu. Við þurfum bara að mæta Maribor eins og menn."

Valur mun leika fyrri leikinn á heimavelli á Hlíðarenda, 9. eða 10. júlí og seinni leikurinn verður svo ytra 16. eða 17. júlí. Bjössi segir það ekki skipta miklu máli í heildarsamhenginu hvort fyrri leikurinn sé leikinn heima eða ytra.

„Við þurfum bara að standa uppréttir eftir fyrri leikinn, sama hvort hann hefði verið heima eða úti og eiga möguleika í seinni leiknum. Það er það sem maður vill sjá eftir fyrri leikinn í þessum Evrópuleikjum. Við viljum vera í góðum möguleika fyrir seinni leikinn á að komast áfram."

Verður Hannes með á morgun?
Valur fer í Frostaskjólið annað kvöld og mætir þar KR í 9. umferð Pepsi Max-deildarinnar. Landsliðsmarkvörðurinn, Hannes Þór Halldórsson lék ekki með Val í 5-1 sigri liðsins gegn ÍBV á laugardaginn vegna meiðsla. Bjössi vildi lítið gefa upp hvort Hannes væri orðinn leikfær fyrir leikinn á morgun og hvort hann myndi æfa með Val á æfingu í dag.

„Það verður að koma í ljós. Við sjáum hvað setur, ég vona það. Maður veit það ekki ennþá," sagði Sigurbjörn Hreiðarsson aðstoðarþjálfari Vals að lokum.

Sjá einnig:
Valur til Slóveníu í Meistaradeildinni