Hver tekur við af Klopp? - Dani Olmo orðaður við Man Utd - Greenwood í skiptum fyrir Gleison Bremer
   fim 18. júní 2020 21:07
Guðmundur Aðalsteinn Ásgeirsson
Pepsi Max-kvenna: Fjallið hátt fyrir Selfoss eftir tvær umferðir
Breiðablik vann Selfoss og Agla María skoraði sigurmarkið.
Breiðablik vann Selfoss og Agla María skoraði sigurmarkið.
Mynd: Anna Þonn - fotbolti.net
Valur byrjar á tveimur sigurleikjum.
Valur byrjar á tveimur sigurleikjum.
Mynd: Fótbolti.net - Hafliði Breiðfjörð
Fylkir hefur einnig unnið tvo af tveimur.
Fylkir hefur einnig unnið tvo af tveimur.
Mynd: Fótbolti.net - Hafliði Breiðfjörð
Stjarnan náði í sín fyrstu þrjú stig.
Stjarnan náði í sín fyrstu þrjú stig.
Mynd: Fótbolti.net - Hafliði Breiðfjörð
Markmið bikarmeistara Selfoss fyrir sumarið eru að vinna tvöfalt. Líkurnar á því að ná þessu markmiði minnkuðu til muna í kvöld þegar Selfyssingar töpuðu sínum öðrum leik af tveimur mögulegum í Pepsi Max-deild kvenna.

Selfoss tapaði 1-0 fyrir Fylki í fyrstu umferð og í kvöld fékk liðið erfitt verkefni á heimavelli gegn Breiðabliki, liðinu sem margt fólk spáir Íslandsmeistaratitlinum.

Blikar byrjuðu leikinn á Selfossi af krafti og komust yfir eftir aðeins þrjár mínútur. Agla María Albertsdóttir skoraði. „Sveindís Jane með langt innkast og það myndast klafs í teignum sem endar með því að Alexandra Jóhanns fær boltann í hausinn, Agla María er á hárréttum stað og þarf einungis að pota boltanum yfir línuna," skrifaði Arnar Helgi Magnússon í beinni textalýsingu.

Þegar leið á leikinn þá hefði Selfoss alveg getað jafnað, en þegar þú nýtir ekki færin þá er þér oft refsað og það gerðist á 82. mínútu þegar Alexandra Jóhannsdóttir skoraði annað mark Blika og gulltryggði sigurinn fyrir Kópavogsfélagið.

Lokatölur 2-0 og er Breiðablik með sex stig eftir tvær umferðir. Selfoss er með núll stig. Í ljósi þess að hvorki Breiðablik né Valur töpuðu leik í fyrra þá verður það ansi erfitt fyrir Selfoss að vinna upp þennan mun, þó það séu nú býsna lítið búið af mótinu.

Þróttur gaf ekkert eftir gegn Val
Í Laugardalnum gáfu nýliðar Þróttar Íslandsmeisturum Vals ekkert eftir lengi vel. Valskonur byrjuðu mjög vel í leiknum, en svo virtist Þróttur ná forystunni á 25. mínútu. „Margrét Sveins hefur betur í baráttunni við varnarmenn Vals OG Söndru og nær að koma boltanum að marki. Boltinn virðist vera kominn yfir marklínuna þegar Elísa mætir og sópar honum út/af línunni?" skrifaði Mist Rúnarsdóttir í beinni textalýsingu en ekki var dæmt mark.

Staðan var markalaus í fyrri hálfleik og heimakonur væntanlega svekktar að vera ekki yfir. Þegar klukkutími var liðinn af leiknum skoraði Elín Metta Jensen fyrsta mark leiksins er hún braut ísinn eftir klaufagang í vörn Þróttar.

Diljá Ýr Zomers tvöfaldaði forystuna stuttu síðar eftir að hafa komið inn á sem varamaður en tíu mínútum síðar minnkaði Linda Líf Boama, sem skoraði 22 mörk í 18 leikjum í 1. deildinni í fyrra, muninn fyrir Þrótt sem gafst ekki upp. Þær gáfust ekki upp, en þær náðu ekki að jafna og lokatölur 2-1. Reynslan í Valsliðinu sýndi sig á lokametrunum.

Fylkir leiðir Blikum og Val
Fylkir er á toppnum ásamt Breiðabliki og Val þegar átta af tíu liðum deildarinnar hafa spilað tvo leiki. Fylkir gerði góða ferð í Vesturbæinn í kvöld og vann á Meistaravöllum gegn liði KR. Fylkir setti tóninn strax í byrjun þegar Þórdís Elva Ágústsdóttir skoraði þegar ekki ein mínúta var liðin af leiknum.

Fylkir vann að lokum 3-1 sigur og er með sex stig eins og Breiðablik og Valur. Spurning er hvort að Fylkir geti verið með í toppbaráttunni í sumar. KR, aftur á móti, er án stiga eftir tvo leiki og telst það auðvitað sem vonbrigði í Vesturbænum.

Stjarnan spilaði afar illa í fyrstu umferð gegn Þór/KA og tapaði 4-1. Í kvöld náðu Stjörnustelpur í sinn fyrsta sigur þegar þær unnu 3-0 sigur gegn FH á heimavelli. Mjög flottur sigur hjá Stjörnunni sem setur þrjú stig á töfluna. Nýliðar FH eru án stiga eins og KR, Selfoss og Þróttur.

Hér að neðan má sjá úrslit kvöldsins og textalýsingar. Umferðin klárast á laugardaginn með leik Þórs/KA og ÍBV.

Úrslit kvöldsins:

Þróttur R. 1 - 2 Valur
0-1 Elín Metta Jensen ('60 )
0-2 Diljá Ýr Zomers ('67 )
1-2 Linda Líf Boama ('77 )
Lestu nánar um leikinn

Selfoss 0 - 2 Breiðablik
0-1 Agla María Albertsdóttir ('3 )
0-2 Alexandra Jóhannsdóttir ('82 )
Lestu nánar um leikinn

Stjarnan 3 - 0 FH
1-0 Betsy Doon Hassett ('35 )
2-0 Shameeka Nikoda Fishley ('62 )
3-0 Shameeka Nikoda Fishley ('68 )
Lestu nánar um leikinn

KR 1 - 3 Fylkir
0-1 Þórdís Elva Ágústsdóttir ('1 )
0-2 Bryndís Arna Níelsdóttir ('69 , víti)
1-2 Kristín Erna Sigurlásdóttir ('70 )
1-3 Margrét Björg Ástvaldsdóttir ('84 )
Lestu nánar um leikinn
Athugasemdir
banner
banner
banner
banner