Leikaðferð Sarri hefur verið kölluð 'Sarri ball' en um er að ræða leikaðferð sem hann notaði einnig hjá Napoli áður en hann tók við Chelsea.

'f*** Sarri-ball' sungu stuðningsmenn Chelsea í gær sem og 'þú veist ekki hvað þú ert að gera!'

Þá sungu stuðningsmennirnir einnig nafn Frank Lampard en margir vilja sjá hann taka við af Sarri. Lampard er goðsögn hjá Chelsea en hann er í dag stjóri Derby.

„Ég heyrði ekki vel hvað þeir voru að syngja. Ég hef aldrei heyrt sungið um mig áður en einhverntímann er allt fyrst," sagði Sarri sjálfur um málið.

Stuðningsmenn Chelsea voru ósáttir við skiptingarnar hjá Sarri í gær en Ross Barkley, Davide Zappacosta og Willian komu inn á sem varamenn á meðan hinn ungi Callum Hudson-Odoi fékk ekki tækifæri.

Chelsea hefur tapað þremur af síðustu fimm leikjum í ensku úrvalsdeildinni og er dottið niður í 6. sæti deildarinnar. Liðið mætir Malmö í Evrópudeildinni á fimmtudag áður en úrslitaleikur deildabikarsins fer fram á sunnudag þar sem Chelsea mætir Manchester City.