Eins og mörg önnur knattspyrnufélög á Íslandi þá hafa Framarar lækkað laun. Ásgrímur Helgi Einarsson, formaður knattspyrnudeildar Fram, segir frá þessu í samtali við Morgunblaðið.
„Það var mikill samhugur hjá öllum innan félagsins um að taka á sig launalækkun," segir Ásgrímur.
Laun verða lækkuð um 50 prósent og verður staðan endurskoðuð á tveggja mánaða fresti.
„Til að byrja með munu allir lækka um 50% í launum og við munum svo skoða stöðuna á tveggja mánaða fresti fram eftir ári," segir Ásgrímur, en ástandið er erfitt vegna veirunnar. Enginn fótbolti er í gangi á Íslandi og illa gengur að fá styrktaraðila. Óvissan er mikil.
Ljóst er að rekstur knattspyrnufélaga hér á landi verður erfiður vegna tekjutaps og hafa önnur félög eins og KR, Valur, ÍA, Fjölnir, KA, Þór og Þróttur R. tilkynnt opinberlega um launaskerðingar á þessum erfiðu tímum.
Athugasemdir