England: Liverpool og West Ham með annan fótinn í Evrópu

Liverpool var betri aðilinn en heimamenn í Burnley fengu sín færi. Fyrsta mark leiksins kom skömmu fyrir leikhlé og var það Roberto Firmino sem skoraði eftir sendingu frá Andy Robertson.

Nathaniel Phillips tvöfaldaði forystuna í upphafi síðari hálfleiks með skalla eftir fyrirgjöf frá Sadio Mane. Alex Oxlade-Chamberlain gerði svo út um viðureignina á lokamínútunum.

Liverpool er komið í Meistaradeildarsæti á markatölu og nægir að öllum líkindum sigur í lokaumferðinni til að tryggja sér fjórða sætið. Liverpool tekur á móti Crystal Palace.

Leicester er með jafn mörg stig og Liverpool en lakari markatölu og tekur á móti Tottenham í lokaumferðinni.

Burnley 0 - 3 Liverpool
0-1 Roberto Firmino ('43)
0-2 Nathaniel Phillips ('52)
0-3 Alex Oxlade-Chamberlain ('88)

West Ham er þá á góðri leið með að tryggja sér Evrópudeildarsæti eftir sigur gegn föllnu liði West Bromwich Albion.

Declan Rice klúðraði vítaspyrnu snemma leiks og tóku heimamenn forystuna gegnum Matheus Pereira.

West Brom sýndi góða takta en tókst ekki að tvöfalda forystuna. Þess í stað jafnaði Tomas Soucek skömmu fyrir leikhlé.

Síðari hálfleikurinn var jafn þar til á lokakaflanum þegar gæðamunur liðanna kom í ljós. Hamrarnir komust yfir með marki frá Angelo Ogbonna áður en Michail Antonio innsiglaði sigurinn á 88. mínútu.

West Ham er í Evrópudeildarsæti sem stendur og nægir jafntefli gegn Southampton í lokaumferðinni til að tryggja sér sætið.

West Brom 1 - 3 West Ham
0-0 Declan Rice, misnotað víti ('3)
1-0 Matheus Pereira ('27)
1-1 Tomas Soucek ('45)
1-2 Angelo Ogbonna ('82)
1-3 Michail Antonio ('88)