Danny Ings skoraði eina mark fyrri hálfleiks þegar Southampton heimsótti Bournemouth í Suðurstrandarslag í ensku úrvalsdeildinni.

Ings hefði getað komið Southampton í 0-2 á 59. mínútu en Aaron Ramsdale varði vítið. Þriðja vítið sem fer forgörðum hjá Southampton á leiktíðinni í fjórum tilraunum.

Varamaðurinn Sam Surridge virtist vera að jafna leikinn í uppbótartíma fyrir heimamenn en Callum Wilson var dæmdur rangstæður í aðdraganda marksins þegar það var skoðað í VAR. Che Adams innsiglaði svo sigur gestanna á 8. mínútu uppbótartíma.

Bournemouth er eftir leikinn þremur stigum á eftir Watford í baráttunni um öruggt sæti í deildinni og fjórum mörkum. Watford á tvo leiki eftir á meðan Bournemouth á einungis einn leik eftir. Aston Villa á einnig möguleika og liðið á tvo leiki eftir.