Leikurinn fór rólega af stað og það sást að mikilvæg stig voru í boði. KR var meira með boltann en eftir tæplega tuttugu mínútna leik setti Óskar Örn boltann í slánna eftir að hafa farið framhjár varnarmanni Víkinga.

Eftir rúmlega hálftíma leik skoraði Finnur Tómas en flaggið fór á loft og markið dæmt af KR.

Það var síðan á 41. mínútu sem að Kristján Flóki Finnbogason kom KR yfir eftir gjörsamlega magnaða sendingu frá Kristni Jónssyni inn fyrir vörn Víkings. Staðan 1-0 í leikhléi.



Arnar Gunnlaugsson gerði tvær breytingar í hálfleik. Logi Tómasson og Atli Hrafn Andrason komu inn fyrir Kwame Quee og Halldór Smára Sigurðsson.

Víkingur R. náði ekki að ógna marki KR af alvöru í síðari hálfleik þrátt fyrir að spilamennska KR hafi ekki verið neitt sérstaklega frábær.

Tobias Thomsen fékk frábært tækifæri til þess að gera út um leikinn í uppbótartíma en varnarmaður gestanna komst fyrir skotið.

Einar Ingi flautaði af og enn einn sigur KR staðreynd og liðið er sem stendur með tíu stiga forskot á toppi deildarinnar. Víkingur R. er í tíunda sæti, aðeins stigi frá fallsæti.