Stjarnan tók á móti KA á Samsung-vellinum í kvöld í 20. umferð Pepsí-deildar karla og gerðu 1-1 jafntefli. Rúnar Páll þjálfari Stjörnunnar sagði að liðið hefði verið nálægt því að klára leikinn en að KA hefðu verið öflugir og þeir átt í basli með þá.
„Við fengum góð færi til að skora fleiri mörk, sérstaklega hérna í lokin en það er stutt á milli í þessum bransa. Hefðum við skorað úr þeim færum værum við í mikið betri málum en við vorum bara að spila við hörkulið, KA menn voru öflugir og við vorum í basli með þá"
Titilvonir Stjörnunnar eru nánast úti eftir þennan leik en Rúnar segir að liðið verði bara að vona það allra besta, þá segir hann að Ólafur Jóhannesson þjálfari Vals lýti á lokaleik sinn gegn Keflavík sem klár 3 stig.
„Tölfræðilega er það hægt en það er mjög erfitt, Valur þarf að misstíga sitt allsvakalega til þess. Óli Jó sagði við mig að hann ætti bara einn leik eftir ekki tvo, fyrir honum er Keflavíkurleikurinn bara klárt mál en það er bara þannig. Við þurfum að klára okkar leiki til að eiga séns á þessu."
Aðspurður hvort þreyta hefði verið í mönnum eftir bikarúrslitaleikinn á laugardaginn sagði Rúnar að það hefði ekki verið vandamálið í dag enda var kraftur í liðinu.
„Nei það var ekki vandamálið, það voru einhverjir þreyttir í seinni hálfleik en þá gerðum við bara skiptingar og komu hrikalega frískir menn inn. Við herjuðum á þá í lokin og það voru engin þreytumerki að sjá."
Athugasemdir