Rose var ekki með í sigrinum á Middlesbrough í FA-bikarnum og var ekki í hóp í markalausu jafntefli gegn Watford á laugardag. Hinn tvítugi Japhet Tanganga spilaði í vinstri bakverði gegn Watford.

Mourinho segir að Rose hafi ekki tekið þátt í leiknum gegn Watford vegna meiðsla, hann sé enn í plönum sínum.

„Já, hann er hluti af plönum mínum," sagði Mourinho. „Við spiluðum með mjög sókndjarft lið gegn Middlesbrough og ég vildi líka gefa ungum leikmönnum tækifæri, og gefa (Ryan) Sessegnon tækifæri til að spila 90 mínútur."

„Rose þarf ekki þannig leiki, hann er nú þegar leikmaðurinn sem hann er."

„Í dag gat hann svo ekki spilað vegna smávægilegra bakmeiðsla."

Hinn 29 ára gamli Rose verður samningslaus hjá Tottenham eftir eitt og hálft ár og hann hefur lýst því yfir að hann ætli ekki að gera nýjan samning.

Rose hefur sagt að hann ætli að fara frá Tottenham þegar samningurinn rennur út, en Mourinho hefur áður talað um að hann hafi litlar áhyggjur af því.