Ólafur Ingi Skúlason er að taka við þjálfun U19 landsliðs karla og U15 landsliði kvenna. Þetta herma heimildir mbl.is.
Ólafur Ingi hefur látið af störfum sem aðstoðarþjálfari Fylkis í Pepsi Max-deildinni.
Ólafur Ingi, sem er 37 ára gamall, var spilandi aðstoðarþjálfari Fylkis á síðasta tímabili en þeir Atli Sveinn Þórarinsson og Ólafur Ingi Stígsson voru ráðnir aðalþjálfarar fyrir tímabilið.
Ólafur á að baki 36 A-landsleiki en hann var atvinnumaður á Englandi, í Svíþjóð, Danmörku, Belgíu og Tyrklandi. Hann tekur við U19 landsliðinu af Þorvaldi Örlygssyni sem er orðinn þjálfari Stjörnunnar við hlið Rúnars Páls Sigmundssonar.
Davíð Snorri orðaður við U21 landsliðið
Enn á eftir að tilkynna ráðningu á þjálfara U21 landsliðs karla en það eru um tveir mánuðir í að riðlakeppnin á lokamóti EM fer af stað.
Davíð Snorri Jónason, sem stýrt hefur U17 landsliðinu undanfarin ár, hefur verið sterklega orðaður við starfið. Sögusagnir hafa verið í gangi um að þegar hafi verið gengið frá ráðningu hans. Davíð er fyrrum þjálfari Leiknis og fyrrum aðstoðarþjálfari Stjörnunnar.
Athugasemdir